TEMBO TIGO LUHAH SEMURUP

URAIAN TEMBO PEMAKAIAN DI TIGO LUHAH SEMURUP

Baramulo kami mulai menyusun ico pakai adat lamo pusako usang di Tigo Luhah Simuhut, dilingkung Payung keturunan Koto Payung Semurup Tinggi beserto dengan Keturunan Gunung Sati Talang Melindung tanggal tigo puluh bulan duo seribu seratus tujuh (3-2-1107). Tatkalo lah selesai mengarah dengan mengajun ilo dengan bentang, wateh dengan bateh, rinteh rimbo nge mulawo, rumah gedang celak piagam, lah di uni sko lah di junjung, arah ajun lah tentu, wateh dengan bateh lah tahu, rinteh rimbo dengan mulawo lah nampak, barulah kami duduk busamo-samo, dengan hati yang suci, muko yang jernih, antaro kami duo keturunan satu asal satu keturunan Kuto Payung Semurup Tinggi dengan Gunung Sati Talang Lindung untuk menentukan pegangan kami masing-masing beserto mengelanokan arah dingen ajun dilingkung wateh dengan bateh di Tigo Luhah Simuhut.

Inilah susunan tertib kagedong skonyo beserto mengelanokan arah dingen ajun di Tigo Luhah Semurup pegangan masing-masing kami:
1. Sigumi Nan Tujuh memegangkan titah nan sati dirumah Rajo, rumah pesusun Tigo luhah Semurup
2. Dipati nan batigo memegangkan perintah dengan keramat, arah dengan ajun, wateh dengan bateh, rinteh rimbo dingan mulawo dilingkung Tigo Luhah Simuhut.
3. Pemangku Nan Baduo memangkukan titah nan sati dari Rajo, menyampaikan kato dingan kuramat, kepado anak butino dalam di Tigo Luhah Semurup berjalan meringan kaki, berkato melangsing lidah, suaro dingan nyaring jauh di jeput, dekat dipanggin, duduk busamo mintak diawai
4. Ninek Karamenti yang selapan memegangkan gawi dengan karjonyo, mengelanokan titah nan sati, mengerjokan perintah dengan kuramat di Tigo Luhah Semurup
5. Anak Batino dalam, mengelanokan arah dingan ajun, menghunikan rumah gedang Pencelak Piagam, batungku jarang, bapiuk gedang, balapik liba

Inilah roboknyo kagedongyo masing-masing duo keturunan satu asal satu keturunan di Tigo Luhah Semurup salah satu antaro Sigumi Nan batujuh yang duduk berundin dingan dipati nan butigo di rumah Pesusun Tigo Luhah Semuhut di rumah Balai Adat yang Munganjung yolah Sigumi Nan Butigo;
1) Sigumi Tanah Jambi, kagedongnyo satinyo menguraikan ico pakai adat lamo pusako usang, diolah yang menentukan gawe dingen kerjonyo menyambut kato dalam berunding, menimbang dawah sedang butingkah, setelah undin lah seluku, katolah mufakat barulah Sigumi Tanah Jambi memberi berito kepado saudaronyo yang duduk diruang rumah rajo nan didalam. Beritolah sampai, kato lah jleh, barulah Sigumi Tanah Jambi menyerahkan Jato dingan burumbak, cerpuk dingen sati kepado Mangku Rajo Tuo tando Titah Rajo lah Jatuh.

2) Sigumi Kudrat, kagedongyo satinyo yang menghat kato dalam mufakat, membulatkan undin sedang butingkah, membuun dio mti, bakato kato mti, kato sipatah idak barubah, kato tiucap idak diulang, kato digeggam idak mengungkai, namun undin tetap bulat, duduk tertib bakato dio supan, memegangkan keris dengan sati itu titah dari Rajo
3) Sigumi Dubalang Bungsu, kagedongnyo yang memegangkan Dubalang Rumah Karjen nan Sati di Rumah Pasusun Tigo Luhah Simuhut. Diolah yang duduk mengembangkan dado, basilo menyilangkan kaki memandang matonyo jalang memisahkan mendah dingan musuh, memimpin Rajo sedang barunding.

Inilah susunan tertib kagedongnyo sko dilingkung keturunan Tigo Luhah Simuhut, artinyo Sko Sati, artinyo Pusako Kuramat
Pegangan sko :
Sko memegangkan rumah Celak Piagam, tembo keturunan, tembo tanah, wateh dengan bateh, rinteh rimbo dingen melawo, lantak idak guyang, cermin idak kabu, ico pakai idak buranjak, bakato dio mati, babuun dio meti sejak dulu sampai sekarang
Undang-undang menjunjung sko tunggu warih
 Hilang ninek timbun mamak, hilang mamak timbun punakan, sko idak dinamokan turun, sko dinamokan timbun dingen sendirinyo menurut sati keturuna. Dingen namo sko tidak buleh direbut, idak pulo di raih, namun sko nan sati tetap timbun

Artinyo sko tunggu warih
 Hilang ninek timbun kemamak, hilang mamak timbun ke punakan, hilang tuo buganti mudo, hilang tubuh timbun badan, inilah yang dinamokan sko tunggu warih
Undang-undang lahong Ico Pakai Adat Lamo Pusako usang di Tigo Luhah Semuhut .
1. Undang-undang lahong dipegang sigumi nan tujuh, yang menjalankan titihdari rajo
2. Meh lahongnyo dipegang depati nan Batigo di tigo luhah Simuhut
3. Menerbitkan meh lahongnyo, dipegang ninik mamak karamenti nan silapang
4. Meh lahong dibebankan kepada anak butino dalam, tidak ado breh atah dikisai, tidak bukayu jenjang dingkah, idak nyado dirumah kimak kubawah, namun lahong terbit jugo. Kalau meh lahongnyo nyado nia turunlah kebawah idak jugo dapat, mako meh lahongnyo dibebankan kepada sko salah satu penghulu Depati yang butigo untuk membayarnyo, karno anak butino lah tipijak digunung ahang lah tipijak gunung kapo, namun lahong tetap ditebit namo sko tetap ditabin, kcik mak ado namo, gedang mak ado gla namun adat idak rusak,
lambago idak sumbing, ico pakai mak nyu nyalo, gadang mak nyu abih, kcik idak kami tibun namun adat tetap dipegang, sarak jadi peduman ico pakai tetap dijalan, nyato diareh, terang dialam, namun hutang tetap dibaya, namun duso tetap ditubat.

Mulai orang menamokan undang-undang lahong
Tatkalo maso dulu, dendam idak sudah samapai keturunannyo, hati bangih baleh membaleh, intip menjadi-jadi, anak butino dingan tinayo, yang bagak dingan diateh, yang burmeh dingan mnang, yang lemah membayar hutang. Adat dipegang lah lemah, syarak peduman idak dijalan, ico pakai lah tentu idak dituhut, kampung truh ditimpo bla, anak butino hilang peduman, idak centu ujung dingan pangkan, raso nak mudik raso nak ile, kedahat salh kelembak salah, idak tentu peduman yang dipegang, inilah adat jahiliyah

Yang dinamokan lahong, yolah ulek dendam sampai keturunannyo menurut hawa nafsu sitan iblih, memegangkan adat badan suranglah, tidak bupuduman dengan yang sebenarnyo adat, inilah yang dinamokan Lahong
Lahong terbagi duo bagian
I. Lahong Rajo Depati Nan Butigo
II. Lahong dipati ninek mamak dilingkung payung keturunan Tigo Luhah Semuhut

1.1 Lahong Rajo Depati Nan Butigo disudahkan dirumah pesusun Tigo Luhah atau dirumah Balai Adat Yang menganjung;
1.2 Lahong Dipati ninek mamak disudahkan dirumah gedang masing-masing di Tigo Luhah Semuhut
Lahong Rajo Dipati Nan Butigo Tigo Luhah Semuhut
1) Menentang perintah Rajo Depati nan butigo dingan bukato kreh, bakicek cabuh, megencang lengan, mengembangkan dado menghadap rajo depati nan batigo, didalam duduk tigo luhah
2) Anak gadih dibunting urang
3) Anak butino titangkap basah
4) Mengeja urang sipanjang simpang, membawo pekai dingan tajam
Lahong yang empat ini disudahkan dirumah adat yang menganjung Tigo Luhah Simuhut, Dendo lahongnyo diterbitkan oleh Anak Inung Tigo Luhah Ijung Panjang. Kecik nyu nak bunamo, gedang nyu nak bugela, muju lalu mulintang patah, namun lahong tetap terbit (Dando Meh Sa Meh).

Lahong Depati Ninik Mamak Tigo Luhah Simuhut:
1) Menyambut lantak Depati Penghulu dalam kampung nan batuo di Tigo Luhah Semuhut
2) Memburu urang sampai kerumah
3) Menepuk anak butino urang
4) Menyencang pakaian anak bini
5) Mengeja anak bini sepanjang jalan
Lahong yang limo robok disudahkan dirumah gedang masing-masing di Tigo Luha Semuhut dengan dendonyo Meh Setengah Meh, diterbitkan oleh Ulu Balang dirumah gedang masing-masing di Tigo Luhah Semuhut

Susunan tertibnyo ico pakai adat membunuh kaki empat setahu Depati Penghulu dalam negeri, parit yang bersudut empat, inilah roboknyo Empat robok
1) nazar
2) kikah
3) kurban
4) berumanah

Empat robok ini yolah panggilan sirih dingan parno awal dingan parno akhirnyo ado maksud dengan hajatnyo inilah yang dikatokan setahu depati penghulu dalam negeri, dendonyo meh setengah meh.

Yang tidak setahu Depati Penghulu dalam negeri tigo robok atau tigo macam:
1) membunuh kaki empat keadaan ternak sakit
2) kijang masuk kampung
3) atau kaki empat berniat untuk daging kejo uhang mati

Tigo robok ini atau tigo macam tidak dapat panggilan sirih atau pakai parno awal atau akhir
Bangun duo bahagian:
1) bangun disengajo
2) bangun tidak disengajo
1.1 bangun disengajo: bangunnyo breh seratus kerbau seekor, kain sekayu idak raut dingen gunting, tidak ado dawah dingen undin, namun bangun tetap dibayar
Bangun dingen di sengajo yolah dengki khianat, dendam idak sudah, lah buniat bermaksud untuk membunuh urang menurut hawa nafsu, bangunnyo termasuk lahong
1.2 Bangun tidak sengajo umpamonyo:
1.2.1 urang mati jatuh dijenjang tanggo kito
1.2.2 urang mati naik kendaraan kito
1.2.3 urang mati didalam rumah kito
Tigo robok itu ado raut dingen gunting, unding dingen selaku
Bangun tidak disengajo dinamokan bangun musibah artinyo sudah suratan Allahuta'ala.
Bangun tersungkut undang duo bagian:
1. Urang mati didalam pekarangan kito
2. Urang mati didalam ladang kito atau diddalam pelak kito
Bangunnyo jatuh dtentukan oleh taliti yang sebenarnyo menurut tingkah laku urang yang tasungkup undan, baik atau jahat tingkah lakunyo selamo hidupnyo, itulah dinamo mati busebab, namun bangun tetap dibayar
Tempat menerbitkan bangun duo tempat
1) Bangun disengajo atau membunuh urang, tempat menerbitkan bangun dirumah adat balai mengajung Tigo Luhah Semurup tabuh bulentung, pedang diangkat , suaro kreh, mato jalang, kecik nyu nak bunamo, gdang nyu nak bugela, namun bangun tetap dibaya
Ado dih mulayu ngato;
Sarih ptuh sari kilat, sati butepuk talingo bngap, nyato diareh terang dialam, anmun adat idak rusak, lambago idak sumbing, namun ico pakai tetap dijalan Anak inong Tigo Luhah Ijung Panjang
2) Bangun idak busengajo, artinyo bangun musibah, maknanyo idak disengajo malang tibo, tempat menerbitkan bangun dirumah gedang masing-masing di Tigo Luhah Semuhut, diterbitkan oleh dubalang rumah gedang beserto dingen depati ninek mamak rumah gedang masing-masing.
Luko bapampeh dua bagian
1) Mamampeh
1.1 Yang dinamokan mamapeh yolah pauk lah tiraso ditangan, niatlah toraso dihati, bakato lah tiraso dilidah, iniilah yang dikatokan mampeh. Tidak adao raut dingen gunting, idak ado undin dawah namun mampeh tetap dibaya
2) Dipampeh
2.1 luko dipameh yolah tidak sengajo
Yang dinamokan luko dipampeh
1) Kujo lpeh urang mulinteh
2) parang diangkat urang nempuh, tidak disengko malang tibo namun luko tetap dipampeh, meh luko mampeh mehnyo menurut teliti pandangan mato Diepati ninik mamak kedua belah pihak seperti : kuyak jangat, bakuak dagin, putuh urat, batakuk tulang, utangnyo separo bangun. Kawan tinayo dibuat awak, urang cacat karno perbuatan.
Disudahkan dirumah gedang masing-masing di Tigo Luhah semuruh, tidak ado raut dingan guntingnyo
Yang dikatokan lembam balu tapung tawa yolah daging nyembo kulit balu, utangnyo bereh sipinggan uang 5 sen (Rp. 2500), kalau sekironyo daging nyembu' kulit balu aka ilang pungenan jauh,masnyoi samolah dingen pampeh
Utang dendo dua parakaro
1) Utang lahong
2) Utang bangun
3) Utang mampeh
4) Utang pampeh
5) Utang lembam balu
Inilah kagedongnyo Rajo serto Depati yang Batigo Di Tigo Luhah Semurup
1) Sigumi Nan Batujuh memegangkan Neraco dingan adil, dungen bna tetap bena, yang salah tetap salah, dio duduk memegang titahnyo
2) Depati nan Batigo; memegangkan adat, syarak, ico pakai kagedongnyo belain-lain.
2.1 Dipati Gumbalo sembah : memegangkan adat dinge sebena adat, babuun meti, bakato mati-mati, salah tetap salah
2.2 Dipati Simpan bumi, memegangkan hukum syarak, yang bna tetap bna, yang salah tetap salah, menurut perintah kitabullah
2.3 Dipati mudo menjalankan Undang-undang ico pakai. Yang lahong tetap lahong, yang bangun tetap bangun, yang mampeh tetap mampeh, lembam balu tepun tawa, namun utang tetap utang, kecik bunamo, gedang bugela, namun ico pakai tetap dijalan
Mulai urang menegakkan Balai adat dingan Manganjung tanggal satu bulan duo seribu dua ratus (1-2-1200). Tempat pelabuhnyo dusun anak butino dalam dusun balai, lamo balai itu ditunggu sampai tahun tanggal duo bulan tigo seribu delapan ratus (2-3-1800) kemudian dari ini tidak disangko-sangko tibolah gempo gedang selamo limo belas hari, tidak henti-henti sampai tanah tiblah, batang ayi buranjak, dusunlah bucerai-cerai, ruamh gedang buranjak-anjak tempat, rumah adat lah rubuh untug baik panunggu rumah adat tidakkan hilang menjadi pegangan kemudian hari.
Inilah pusako penunggu rumah adat balai yang menganjung:
Penunggu karang bumbun rumah adat balai yang munganjung dingan warnanyo
(1) hitam makna hitam tando adat
(2) putih maknanyo syarak
(3) abang/merah tando ico pakai, tabuh penunggu balai yang menganjung
Semenjak rumah adat ditunggu rumah adat sangat nyalo, syarak sangat terang, ico pakai sangat jelang, setumbi idak mundur, setapak idak maju, namun ico pakai tetap dipegang, muju lalu melintang patah, namun pegangan tetap digenggam, idak lamo sudah itu, tibolah Belando kape lanat nak ngumpukan tokoh adat para ulama dirumah pesusun tigo luhah semurup, untuk melihat bendo pusako peninggalan ninek muyang kito yang ada dirumah gedang Tigo Luhah Semurup. Kemudian dari ini bujuk dapat pelitik lah keno diserahkanlah pusako petunggu karabumbun Balai Adat yang menganjung kepado Belando kape lanat, kemudian sudah itu adat mulai guyang, syarak mulai kabu, ico pakai mulai buranjak-anjak, anak butino hilang pegangan dengan pedomannyo
Setelah sudah itu urang yang memegang adat yang sebena adat dibuang jauh-jauh yang tidak dapat dibuang lari kerimb membao adat yang sebenarnyo namun ico pakai yang sebenanyo tetap dipangku. Tatkalo itu adat mulai kacau sarak mulai bakalumak, icopakai mulang bersilang-silang, bala kampung menjadi-jadi, urang satilah mngih keramatlah marah, ngimak anak cuculah ilang pedoman.
Tatkalo lamo sudah itu masuklah urang pakrun dari minang kerbau, untuk menangguk aye sedang kruh, mendauh ikan sedang mauk memasuk kait adat sedang kacau, pujuklah dapat , pelitik lah kno, sesudah itu disusunlah kaji adat, antaro kito dengan urang mnang karbau dingan kato dih mulayo ngato: idak tajak kait mengenai, awak terimpit nak diateh, takurung nak dilua, kalah nak menang, idak juga sedang disitu, dukung sangu ile ke benda jambi mencari banding nak menang, nalak jalan jangan kno, nalak tungkat jangan bah, inilah kaji adat mnang kerbau, menyabung mbuh, kalah idak mau, berunding mbuh sekatai awak, katolah putuh dawa timbul, namun kalah pantang kerbau, itu tuah tanah mnang
Inilah kaji adat ura manng kerbau:
Manih karno gulo,lmak karno santan, tegap karno tungkat, idak dipakai menjadi adat kito, idak sesuai dengan ico pakai adat pegangan ninek muyang kito, adat busendi syarak, syarak busendi kitabullah, ico pakai bersendi sunah nabi, inilah adat yang sebena adatnya dari dulu sampai sekarang, mano yang bna tetap bna, mano yang salah tetap salah, janganlah mencari banding menegakkan benang basah, awak dimakan sumpah krisetio, badan hidup dikandung sumpah, tubuh hancur dikandung duso, keturunan tinggan tituhut bla, kalau menuhut buat dingen janji, dari ninik muyang kito, adat idak buleh didalak, sarak idak buleh dicari,ico pakai jangan dibanding, ini ada sudah disusun dengan syarak sudah dipaham, ico pakai sudah diteliti, betul kato dalam adat, sah kato dalam syarak, sesuao kato dalam ico pakai,
inilah pegangan Ico pakai adat lamo pusako usang sejak dulu sampai sekarang.